RADYO KAMPANA

AGTA nangandam sa sunod sangka

2007-11-07T19:45:00.001-08:00

DOBLE ang himuon nga pagpangandan sa mga sakop sa Airsoft Gamers Tactical Assault (AGTA), team sa Ozamiz City alang sa airsoft competition sa umaabot nga national tournament.

Gipadayag ni Jefferson Salas, team leader sa AGTA nga human nila makuha ang kampeonato niadtong Oktobre 20-21,27 ug 28 sa Mactan Economic Zone, Lapu-lapu City anaa na kanila karon ang pressure ug ang pagdahom sa uban nga sila na usab ang mahimong modaog sa sunod nga airsoft competition. Gumikan sa maong rason tinguha nila nga labing molig-on ang AGTA team aron mapabilin ang kampeonato.

Iyang gidugang nga makanunayon na ang ilang ipahigayon nga practice nga naglangkob sa pagdidiplina sa kaugalingon aron daghan pa nga mga award ang ilang mahakot isip pasidungog ug garbo usab sa Ozamiz.

Gipasabot ni Salas nga maayo nga sport ang airsoft tungod kay mapakita niini ang eksakto nga disiplina sa kugalingon ug malikay sa unsa man nga bisyo ilabina sa ginadiling droga.

Sa bag-ohay pa nga competition nga giapilan sa AGTA sa Lapulapu City, nahimong higpit nga karibal sa team Ozamiz ang SWATDavao nga mao nakakuha sa, first runner up ug ang ASG Dumagute nga nakakuha usab sa ikaduhang dapit.

Moabot sa 16 ka team ang misalmot sa maong competition nga naglangkob sa
ASGBacolod ,ASGBohol, ASGDavao ,ASGDumaguete , ASGGensan ,ASGKoronadal, ASGNCR,CAG Cagayan , CRACK LEGION Cebu ,ILAGA Iligan ,MAG Mandaue, R6 Iloilo, SWAT Davao , TRIDENT KNIGHTS Cebu ugYAWCOY Cebu.

Ang 5th ASG National Airsoft CQB Competition Organizing Committee mipadangat usab sa ilang pasalamat sa mga misalmot nga team aron magmalamposon ang maong kalihukan.(Neptalie Batolenio)

Napulo ka oras mawala ang kuryente

2007-11-07T19:44:00.001-08:00

MAKASINATI og napulo ka oras nga pagkapalong sa sugang dagitabnon ang lima ka electric cooperatives nga nailalom sa National Transmission Corporation (TransCo).

Mawad-an sa kuryente karong Sabado, Nobiyembre 10 sa may alas 7:00 sa buntag ngadto na sa alas 5:00 sa hapon ang Zamboanga del Sur Electric Cooperative (ZAMSURECO) 1, Lanao del Norte Electric Cooperative (LANECO), Misamis Occidental Electric Cooperative (MOELCI) I ug II ug Zamboanga del Norte Electric Cooperative (ZANECO) sa Dipolog City.

Sa gipadangat nga kasayuran sa TransCo oinaagi ni Agapito Quirante, division manager sa Aurora Branch nga ang pagkapalong gumikan sa ipahigayon nga Annual Preventive Maintenance sa 100 MVA power Transformer sa Aurora Substation.

Samtang sa kabahin sa MOELCI II mapalong ang Tangub, Bañadero, Tudela, Jimenez Substation u gang JOMI sa Jimenez.

Hinuon gipasabot ni Quirante mahimong mabalik ang kuryente bisan dili makompleto ang napulo ka oras nga gikatakda basta mahuman ang ilang gimbuhaton.

Pito ka tawo nadakpan sa PNP

2007-10-21T02:45:00.001-07:00

CLARIN,MisOc—Pito ka mga pinangita sa balaod ang nasikop sa mga sakop sa Philippine National Police (PNP) sa managlahing dapit ug operasyon.

Una niini niadtong Septiyembre 12 midangat sa Mahayhay, Marigodon, Lapulapu City ang mga sakop sa Police provincial office sa pagpanguna ni Anecito Partosa, Jr., chief sa intelligence division uban ni Senior police officer 2 Dennis Tano ug mga sakop sa kapolisan sa Lapu-lapu Police Station ug misikop sa usa ka Allan Dula, 39 anyos ang pangidaron, minyo ug lumoplopyo sa Clarin, Misamis Occidental gumikan sa kasong murder.

Gidakop ang suspetsado pinaagi sa gahom sa warrant of arrest nga gipagawas ni Judge Salome Dungog, presiding judge sa Regional Trial Court (RTC) 10 Branch 35, Ozamiz City. Ang nasangpit nga suspetsado ang anaa gipahimutang sa Bureau of Jail Management and Penology (BJMP) Oroquieta City.

Samtang niadtong Oktobre 4 sa may alas 10:30 sa buntag nadakpan sa mga sakop sa kapolisan sa lungsod sa Calamba, Misamis Occidental ang usa ka Perla Combrador, 54 anyos ang pangidaron, usa ka balo ug lumolopyo sa Barangay Mamalad sa nahisgutang lungsod.

Ang maong suspetsado ang gidakop gumikan sa kasong qualified theft. Adunay gitugot nga P28,000 nga piynasa ang korte alang sa iyang temporaryo nga kagawasan.

Sa lungsod sa Aloran, Misamis Occidental nadakpan sa mga sakop sa PNP ang usa ka mangingisda gumikan sa paglapas sa 1998 Fisheries Code of the Philippines.

Ang suspetsado naila nga si Mario Bolado, 39 anyos ang pangidaron ug lumolopyo sa Barangay Macawa. Adunay P4,000 nga piyansa ang gitugot sa korte alang sa temporaryo nga kagawasan sa niini.

Dugang nadakpan mao si Icel Tejano, 30 anyos ang pangidaron ug lumolopyo sa Barangay Macawa gumikan sa kasong estafa. Human nga makapiyansa og P60,000 gibuhian ra kini.

Samtang mga magtiayong magtutudlo sa lungsod sa Bonifacio, Misamis Occidental ang gisikop sa mga sakop sa kapolisan gumikan sa kasong oral grave defamation. Ang maong mga magtutudlo ang gibuhian ra usab human nga makahatag og piyansa nga tag P6,000.

Samtang sa Barangay Mauswagon, La Libertad, Zamboanga del Norte nadakpan sa mga sakop sa kapolisan ang usa ka Raul Lapad alyas Rolly, 36 anyos ang pangidaron, ulitawo, mag-uuma ug lumolopyo sa Victoria, Oroquieta City gumikan sa kasong rape.

Walay piynasa nga gitugot ang korte alang sa kasamtangan kagawasan sa suspetsado. Ang maong suspetsado ang ikatulo sa talaan sa most wanted sa Oroquieta City.

Lungkab migara na usab

2007-10-21T02:43:00.002-07:00

MISIAW na usab ang kaso sa pagpanglungkab ug pagpangawat sa pipila ka bahin sa lalawigan sa Misamis Occidental sibo sa talaan sa Philippine National Police (PNP) provincial office.

Mitaho sa kuwerpo sa kapolisan sa Ozamiz City ang usa ka Leonora Carreon, 80 anyos ang pangidaron, minyo ug lumolopyo sa Barangay Triunfo, Ozamiz City nga gisulod ang iyang panimalay ug gikawat ang pipila ka mga alahas.

Ang suspetsado naila nga si Neil Ryan Gica, 23 anyos ang pangidaron, ulitawo ug lumolopyo sa Catadman, Ozamis City.

Sa imbestigasyon sa mga sakop sa kapolisan nasayran nga ang suspetsado miagi sa bintana pinaagi sa paguba niini duol sa pultahan ug misulod padulong sa kuwarto sa biktima.

Nasakiyo sa suspetsado ang nagkadaiyang mahalong alahas ug ubang importanteng butang.

Sa dihang gilusad sa kapolisan ang follow up investigation nadakpan ang suspetsado.

Nakuha sa posisyon sa suspetsado ang mga alahas nga nagkantidad og P17,000 ug cellular phone nga moabot sa P8,000. Ang suspetsado ang gipasakaan na og kaso sa biktima.

Laing pagpanlungkab nahitabo sa tindahan sa merkado publiko sa lungsod sa Tudela, Misamis Occidental.

Gilungkab sa duha ka mga malapason ang tindahan sa usa ka Esmeralda Cimeni, naa sa legal nga pangidaron, balo, negosyante ug lumolopyo sa Barangay Sebac.

Ang mga suspetsado naila nga sila si Gino Sulasula, 21 anyos ang pangidaron ,walay trabaho, lumolopyo sa Pobacion 4, Clarin, Misamis Occidental ug Christopher Gomonod, 20 anyos ang pangidaron, ulitawo, walay trabaho ug lumolopyo sa Cahayag sakop sa Tudela.

Ang mga suspetsado ang nakit-an sa mga nagpatrolyang mga sakop sa kapolisan samtang nagkarga sa kinawat nga mga butang.

Nabawi sa ilang posisyon ang 14 ka mga t-shirts, 10 ka mga short pants, upat ka mga polo-shirts, usa ka sweat shirt ug usa ka karsones.

Gipasakaan na og kaso ang mga suspetsado sa maong salaod.

Biktima usab ang usa ka Minda Calinga, 44 anyos ang pangidaron, minyo, married, negosyante ug lumolopyo sa lungsod sa Clarin.

Gisulod sa tulo ka wala mailang suspetsado ang ilang panimalay diin ang usa niini mition kaniya sa kalibre .45 nga pistola dungan sa pagpahibalo nga kadto usa ka hold-up nga mimando kaniya sa pagpahapa sa salog.

Ang laing duha ka suspetsado ang armado usab sa kutsilyo.

Mihapa ang biktima uban sa iyang duha ka mga anak.

Nasakiyo sa mga suspetsado ang cash nga moabot sa P15,000, Cellular phone nga mobalor og P3,800.00, duha ka CD Player nga nagkantidad og P5,000, cellphone charger nga mikantidad og P300 ug assorted can goods sa sari-sari store.

Padayon pa nga gilusad sa mga sakop sa kapolisan ang imbestigasyon sa posible nga pag-ila sa mga suspetsado.(Neptalie Batolenio)

Kawatan og kable, puthaw nadakpan

2007-10-21T02:43:00.001-07:00

TANGUB CITY—Gisikop sa mga sakop sa kapolisan niining dakbayan ang usa ka sikad-sikad dirver human nga nakuhaan og kable sa telepono.

Ang suspetsado naila nga si George Cabantac, 54 anyos ang pangidaron ug lumolopyo sa Barangay Migcanaway.

Nakuha sa iyang posisyon ang cable wire nga moabot sa 14 metros ug ang usa ka cutter nga maoy gigamit sa pagputol sa maong linya sa telepono.

Laing nadakpan mao ang tulo ka mga suspetsado human nga namaligya og steel bars ngadto sa usa ka junk shop.

Ang tulo ka mga nadakpan mao sila si Ronald Daog, 24 anyos ang pangidaron, minyo, walay trabaho ug lumolopyo sa Barangay Prenza; Arnel Ordeniza, 19 anyos ang pangidaron, ulitawo, walay trabaho ug lumolopyo sa Barangay Kauswagan ug Arcelito Pelonggo, 22 anyos ang pangidaron, ulitawo, usa ka driver ug lumolopyo sa Barangay Santa Cruz.

Nasayran nga ang tulo ka mga suspetsado namaligya sa 108 ka mga steel bars sa junk shop nga gipanag-iya sa usa ka Julie Flores sa Barangay Maloro.

Ang mga steel bars ang gikawat sa mga suspetsado sa usa ka small river impounding site sa Barangay Prenza. Ang maong mga puthaw ang gikarga sa usa ka habal-habal nga gimaneho ni Peloggo.

Nasayran usab nga ang contractor sa maong proyekto mao ang DL enterprises sa Bañadero, Ozamiz City nga gidumala ni Dalmacio Lim.

Ang tulo ka mga suspetsado ang naa na nagtingkagol sa bilangguan.(Neptalie Batolenio)

Collector sa lending ug kooperatiba gihold-up

2007-10-21T02:42:00.000-07:00

CLARIN, MisOc—Duolan sa P30 mil ang dala sa mga suspetsado sa kasong pagpang-hold up sa managlahing dapit ug mga biktima.

Usa ka kaso sa pagpang hold-up ang nahitabo niining lungsod sa Barangay Poblacion 3 diin ang biktima usa ka lending collector.

Ang biktima mao si Emerson Gaid, 25 anyos ang pangidaron,minyo, collector sa Kenje lending investor sa Oroquieta City ug lumolopyo sa Barangay Canubay sa nahisgutang siyudad.

Ang biktima gihold-up sa tulo ka wala maila nga mga suspetsado nga sakay sa usa ka XRM Honda motor single kolor pula.

Sa imbestigasyon sa mga sakop sa kapolisan ang biktima kasamtangan nga nangolekta sa usa ka tindahan sa pautang sa dihang kalit nga mhinuong ang nasangpit nga motor single sakay ang tulo ka mga suspetsado ug ang usa kalit nga minaog ug miduol kaniya dungan sa pagtion sa .38 kalibre nga revolver.

Gipahapa pa siya sa suspetsado ug gikuha ang collection nga maobot sa P7,000 ug gikuha pa ang yawe sa iyang motor single.

Ang mga suspetsado mipahilayo rumbo padulong sa Ozamiz City.

Samtang sa lungsod sa Aloran, Misamis Occidental duha ka mga trabahante sa Gata Daku Multi-purpose Cooperative ang gihold-up sa duha ka wala mailang suspetsado.

Ang mgha biktima mao sila si Mylen Cobinar, 22 anyos ang pangidaron, dalaga, lumolopyo sa Barangay Maular ug Primo Solindong, 24 anyos ang pangidaron, ulitawo, nagpuyo sa San Vicente Bajo, Oroquieta City ug managsamang account officer sa nahisgutang kooperatiba.

Ang mga suspetsado ang nagsul-ob og maskara nga mition kanila sa wala maila nga kalibre sa armas.

Nasayran nga ang mga biktima sakay sa usa ka motor single nga gimaneho ni Solindong ug sa paghidangat nila sa Purok 4, Barangay Monterico kalit nga gibabagan sila sa mga suspetsado.

Nasakiyo sa mga suspetsado ang ilang collections nga duolan sa P14,000.

Ang mga suspetsado ang dali usab nga mipahilayon sa wala matino nga direksiyon.(Neptalie Batolenio)

Mga politiko gipasidan-an sa Comelec

2007-10-21T02:41:00.002-07:00

MGA kandidato sa Barangay ug Sangguniang Kabataan (SK) election nga nangayo og suporta sa mga politiko gipahimangnoan sa Commission on Election (Comelec).

Una nang gibutyag ni Atty. Dennis Ausan, Regional Election Officer sa Comelec 10 nga dili partisan ang piliay sa barangay.

Kini usab ang hinungdan nga gidid-an ang bisan kinsang pulitiko nga mo-endorso ug makigpulong sa mga tigom partikular na atol sa kampanya.

Gani walay gidala nga mga partido sa mga dagkong pulitiko ang mga kandidato sa barangay ug SK kon oposisyon ba o administrasyon.

Matod sa maong opisyal nga mag-atubang sa mga imbestigasyon ang mga kandidato labina niadtong modaog unya sa piliay sa higayon nga dunay motumaw nga mga reklamo tungod sa pagpangayo nila og suporta sa mga dagkong pulitiko.

Apan sa iyang bahin si Cagayan de Oro City Bise Mayor Vicente Emano nagkanayon nga walay piliay sa nasud nga non partisan kay suportahan gyud kini sa mga dagkong pulitiko.

"Dili man ako mahimong modiskurso apan katungod ko ang paghangyo sa mga tawo nga tabangan ang kandidato nga akong gisuportahan," matod ni Emano.

Samtang gipanawagan ni Atty. Stalin Baguio, City Comelec Officer ning dakbayan sa Cagayan de Oro ang mga kandidato nga dili maglangan pagduso sa ilang certificate of candidacy (CoC) ug dili na magpaabot sa katapusang adlaw nga gitakda.(Sunstar)

Ocampos wala makadawat og cash

2007-10-21T02:41:00.001-07:00

KINAHANGLAN nga magmaigmat ang League of Provinces of the Philippines (LPP) sa migawas nga isyu may kalambigitan sa pagpanuhol sa mga gobernador.

Kini ang gipadayag ni Governor Loreto Leo Ocampos, presidente sa LPP isip reaksiyon sa gipadayag ni Pampanga governor Ed Panlilio ug Bulacan governor Joselito Mendoza nga nakadawat sila og tag P500,000 gikan sa usa ka babaye nga lumilihok sa Malacañang. Diin ang maong kuwarta gisulod sa usa ka paper bag atol sa gipahigayon nga governor’s league meeting.

Gidugang ni Ocampos nga nakurat siya sa dihang migawas ang taho nga adunay nadawat ang mga gobernador gikan sa Malacañang. Hinungdan nga iyang gitawagan ang mga gobernador aron sa pagkompirma sa kamatuoran sa maong taho. Nasayran nga gawas nila ni Panlilio ug Mendoza wala nay lain pa nga nakadawat.

Gisaysay ni Ocampos nga kinahanglan nga mabinantayon sila basin mahisama sa nahitabo sa kongreso nga nagkaguliyang tungod usab sa isyu sa pagpanuhol.

Iyang namatikdan nga adunay pattern nga gisunod ang maong hitabo bisan pa man nga isolated case ang maong hitabo.

Kinahanglan nga magbantay sila tungod kay dili nila buot nga pahimo silang ‘pawn’ o paon alang sa politika sa umaabot nga 2010 presidential elections.

Iyang gipasabot nga ang National politics lahi tungod kay daw kalma lang kini nga tan-awon apan angay nga magbantay tungod kay dako og buto o epekto.

Gipunting ni Ocampos nga dili usab batasan nga mohatag si presidente Gloria Macapagal Arroyo og cash ngadto kanila apan pinaagi kini sa cheque nga nakapangalan sa probinsiya sa gobernador.

Gipasabot niini nga kon mohatag man ang presidente alang kini sa mga proyekto.

Sa maong hilisgutanan gipaniguro ni Ocampos nga ang ilang mga lakang nga pagahimuon alang sa kaayohan sa katawhan.(Neptalie Batolenio)

Mipusil sa sakop sa prensa naila na

2007-10-21T02:40:00.000-07:00

GIILA ang tulo ka mga suspetsado nga nipusil sa usa ka sakop sa prensa sa dakbayan sa Iligan niadtong niaging semana.

Si Jose Pantoja, blocktime commentator sa dxLS Love Radio sa dakbayan sa Iligan niila sa mga responsabli nga sila si Romeo Ragasas, Romeo Vequiso ug Ding Galves.

Ang kumpirmasiyon gihimo ni Pantoja dihang gihinabi siya ni Philip Ken Jaudian sakop sa Cagayan de Oro Press Club (COPC) ug sa Task Force Pantoja.

Si Jaudian ang gitahasan sa COPC nga mohimo og imbestigasiyon subay sa gimugna niini nga Task Force Pantoja isip pagtabang sa biktima ug masulbad ang nahitabo niini.

Unang giila ni Pantoja si Ragasas kay mao kini ang drayber sa XRM Honda nga ilang gisakyan atol sa pagpamusil nila sa bikima.

Pagkasunod adlaw gikumpirmar ni Pantoja ang laing duha ka mga suspetsado nga mao sila si Romeo Vequiso ug Ding Galvez.

Gibutyag ni pantoja nga lima ka higayon siya nga gipusil diin si Galvez ang unang nipusil kaniya makatulo ka higayon ug dihang mobalos unta kini laing kauban nga si Galvez ang nipusil na usab kaniya duha ka higayon.

Matod ni Pantoja ngado kang Jaudian nga kanhi close-in bodyguard ni Kongresista Vicente Belmonte si Vequiso gani gikaengkuwentro man niya kini uban ni Galvez niadtong bulan sa Abril ning tuig sa wala pa ang piliay.

"Politiko ang gusto magpapatay nako," padayag ni Pantoja ngadto kang Jaudian apan wala mohatag og pangalan kinsa nga politiko.

Apan gitin-aw sa kampo ni Belmonte nga dugay na nga iyang gipapahawa Vequiso ug wala na kini nag-alagad kaniya sukad niadtong 2005.

Sa pagsulat ning balita gipasaka na ang kasong murder batok sa mga suspetsado samtang stable na ang kahimtang ni Pantoja human sa operasiyon.

Samtang gipasalig sa COPC nga dili nila buhian ang maong kaso hangtod mahatagan kini og igong kasulbaran gani gimugna nila karon ang grupo sa mga abogado nga sakop sa COPC sa pagpangulo ni Atty. Fred Gapuz aron maoy motabang kang Pantoja.(Sunstar)

Migz mibisita sa Oroquieta, mihapit sa Ozamiz

2007-10-21T02:38:00.000-07:00

SEGURADO na nga mahinayon ang Barangay ug Sangguniang Kabataan (SK) elections karong October 29 sibo sa gipadayag ni Senador Miguel Migz Zubiri.

Ang pahayag ni Zubiri iyang giluwatan atol sa iyang pag-atubang sa mga sakop sa media sa dakbayan niadtong Octobre 13 sa iya usab nga pagbisita sa Oroquieta City atol sa kapistahan niini.

Gidugang ni Zubiri nga una na nga uyon ang mga senador nga i-postpone ang piniliay sa sunod tuig apan gumikan kay kulang na sa panahon ug walay quorum ang mga senador hinungdan nga siento por siento na nga mahinayon ang piniliay.

Sa pagbisita ni Zubiri sa Oroquieta nga mihapit sa Ozamiz City subling gipadayag niini ang paghatag og tag-usa ka milyon ka pesos sa tanang munisipalidad sa Misamis Occidental alang sa mga proyekto ilabina sa mga school buildings ug uban pa nga mga proyekto.

Gipaniguro usab niini ang pagkatuman na sa Panguil Bay Bridge ilabina nga kanunay usab nila kini nga gitutukan.(Neptalie Batolenio)

Polis gipaimbestigahan

2007-10-12T15:29:00.000-07:00

PADAYON nga gitutokan sa kapolisan ang pagsumpo sa tanang matang sa ilegal nga kalihokan ingon man ang pagsikop sa mga most wanted person sa Rehiyon 10.

"Kanunay gihapon ang kampanya sa kapolisan against all forms of illegal gambling activities especially kining suertres," pamahayag ni P/Chief Supt. Teodorico.

Gipasabot ni Capuyan nga usa gihapon kini sa mga priority ug kampanya sa bag-ong PNP Director nga gihingusgang masumpo.

Gani gipaimbestigahan na niini ang usa ka sakop sa polis nga giingong nalambigit sa ilegal nga kalihokan ug kon mapamatud-an nga dunay kamatuoran ang taho dili siya magpanuko pagpahamtang og silot.

Hinoon wala una gibutyag ni Capuyan ang identity sa maong polis aron mahatagan og patas nga pagtagad samtang gipahigayon pa ang imbestigasyon.

Matod sa opisyal nga dili ikalimod nga dunay mga polis nga nalambigit sa maong ilegal nga kalihokan apan iyang gipasabot nga dili sila makahimo og tukmang aksiyon batok niini kon walay mopasaka og pormal nga reklamo batok sa usa ka polis.

"I-file ninyo ang inyong reklamo para atong susihon dili puwede nga taman ra sa sulti ug pag-akusar," padayag ni Capuyan.(Sunstar)

Monitoring sa PDEA-10 nahuman na

2007-10-12T15:28:00.000-07:00

DILI lang magsentro sa pagpangdakop sa mga gituohang tigpayuhot sa gidiling mga druga ang tumong karon sa Philippine Drug Enforcement Agency (PDEA) 10.

"We focus to conduct a unified, integrated, unprecedented and balance approach in our campaign," pamahayag ni Supt. Glenn Dela Torre, Regional Director sa PDEA-10.

Matod ni Dela Torre nga anaa na sila sa proseso sa pagpatuman sa ilang mga operasyon sa pipila ka mga dapit labina nga nahuman na ang ilang monitoring period diha sa pag-ila sa mga suspetsado ug sa ilang mga koneksiyon.

Nasayran nga nadugangan na usab ang mga personahi sa PDEA-10 human kini nang-hire niadtong niaging bulan ingon man subling gipabalik ang daan nga mga personahi.
"Kailangan makisali rin ang ibang concerned agencies at saka ang local communities especially barangay officers," dugang ni Dela Torre.

Si Dela Torre nipasabot nga dili lang ang PDEA-10 ang bugtong dunay responsibilidad pagsumpo sa kalihokan sa gidiling druga apan sa kadaghanan.

Gani siya nidugang nga mas labaw nga dunay dako nga katungdanan ug responsibilidad ang mga opisyal sa barangay ingon man ang mga ginikanan mismo.

"Drug addiction is a reflection also kung anong klaseng community meron tayo," padayag niini.

Comelec mipahimangno sa campaign period

2007-10-12T15:27:00.000-07:00

GIPAHIMANGNOAN sa Commission on Election (Comelec) Northern Mindanao ang mga kandidato sa Barangay ug Sangguniang Kabataan (SK) nga mosubay sa mga sumbanan diha sa ilang pagpangampanya.

Si Lawyer Dennis Ausan, Regional Election Officer sa Comelec nipasabot nga walay mga kandidato nga mohimo og mga tigom o bisan unsa nga mga kalihokan nga maglambigit sa pagpangampanya nga wala pa sa gikatakdang adlaw.

"The campaign period will start on October 19 hanggang sa 27," pamahayag ni Ausan .

Si Ausan nagkanayon nga bisan sa barangay nga piliay dunay mga sumbanan nga gipatuman ug angay sundon sa mga kandidato base sa omnibus code of election.

Gidid-an usab ang mga kandidato nga manghatag ug mang-apod-apod og mga pagkaon ingon man bisan unsang matang sa mga donasyon.

Lakip sa gidili mao ang pagpahimutang sa ilegal nga mga poster ug campaign materials nga makadaot sa mga dapit ug sa gibutangan niini.

Walay mga proyekto ug kalamboan nga himoon ug ipatuman sa barangay atol sa campaign period.

"Ang pinaka-importante sa lahat bawal ang pagbenta ng mga liquor at the eve of election," dugang ni Ausan.

Magsugod ang pagboto sa alas 7:30 sa buntag ug gipahinumduman ni Ausan ang mga botante nga usa lang ka higayon sila mobotar.

Subay niini si Ausan naglaum nga sundon sa mga kandidato ug mga botante ang mga sumbanan sa piliay aron hapsay ang pagpahigayon sa maong kalihokan.(Sunstar)

Calica polihan sa pagka-hepe sa Ozamiz

2007-10-11T07:59:00.001-07:00

GIANGKON sa Philippine National Police (PNP) provincial director sa Misamis Occidental nga gikatakdang polihan ang hepe sa kapolisan sa Ozamiz City.

Gipadayag ni Police senior superintendent Erwin Villacorte nga gikatakda na nga polihan si Police superintendent Cupid Calica isip hepe sa kapolisan sa Ozamiz City.

Gidugang niini nga sibo sa ilang gisunod nga lagda nga kon moabot na sa duha ka tuig ang usa ka hepe nga mangatungdanan ilisan na usab kini aron nga kahatagan og kahigayunan ang lain pa nga mga sakop sa kapolisan.

Gipasabot ni Villacorte nga bisan si Calica maayo og agi ginahanglan nga i-relieve kini apan wala pa nila kini malihok gumikan kay adunay Commission on election (COMELEC) ban sa panahon sa pag-relieve.

Mahimong mapatuman ang pag-relieve sa panahon sa COMELEC ban kon aprobahan kini sa Comelec.

Gisaysay ni Villacorte nga posible human sa election mailisan na si Calica sa pagka-hepe sa Ozamiz.

Gani aduna na lima ka mga gipilian nga mahimong hepe sa Ozamiz puli ni Calica. Gidugang niini nga ila na usab nga giduso ang listahan ngadto ni Ozamiz City Mayor Reynaldo Parojinog Sr., aron nga kini makapili.

Wala ibutyag ni Villacorte ang ngalan sa lima ka mga opisyal sa PNP nga gipilian nga hulip ni Calica apan miugong ang taho nga posible nga si Police Senior Inspector Wilbur Salaguste ang group Director sa 1005th Provincial Mobile Group (PMG).

Sa dihang gikuhaan sa iyang reaksiyon si Salaguste wala kini mokomentaryo apan iyang gipasabot nga bisan asa siya ipahimutang basta adunay kamanduan iyang tumanon.(Neptalie Batolenio)

Tulo ka dinakpan kasohan sa paglapas sa gun ban

2007-10-11T07:44:00.001-07:00

KASONG paglapas sa Commission on Election (COMELEC) gun ban ang atubangon nga kaso sa duha ka mga sakop sa Provincial Government Office-Civil Security Unit (PGO-CSU) ug usa ka sakop sa Philippine National Police (PNP) human nga walay gikapakitang kamatuoran gikan sa COMELEC sa pagdala og armas niini.

Gipadayag ni PNP provincial director Police senior superintendent Erwin Villacorte nga milutaw sa ilang imbestigasyon nga human madakpi sa siyudad sa Ozamiz ang tulo wala kini gikapakita nga pagtugot sa COMELEC sa pagdala og armas.

Kahinumduman nga nadakpan sa mga sakop sa kapolisan sa Ozamiz City pinaagi usab ni Mayor Reynaldo Parojinog sila si Sonny Jon Tagaloguin, Mario Manisan ug Police officer 2 Norberto Libres.

Gidugang ni Villacorte nga sigurado nga pasakaan sila og kaso may kalambigitan sa pagdala-dala og armas nga walay pagtugot sa COMELEC.

Gawas sa maong kaso, laing kaso ang posible nga ipasaka ngadto nila ni Tagaloguin ug Libres human migawas ang duha ka mga saksi nga nagtumbok nila nga responsabli sa pagposil ni Emmanuel Cabrera, driver-bodyguard ni Clarin Municipal Mayor David Navarro niadtong Oktobre 5.

Gipunting ni Villacorte nga nagtinguha usab siya sa pagpdala og komunikasyon sa Provincial Government gumikan kay ang duha sa mga dinakpan adunay identification card isip sakop sa CSU sa lalawigan. Samtang mosulay sa pagpakigdugtong si Villacorte ngadto sa Autonomous Region in Muslim Mindanao (ARMM) aron sa pagsuta sa tinuod nga kahimtang ni PO2 Libres ilabina nga didto kini nasakop.

Gihulat pa usabang resulta sa ballistic examination sa crime laboratory aron pagsuta kon aduna bay kamatuoran ang pagtumbok nila ni Tagaloguin ug Libres nga adunay kalabutan sa pagpatay ni Cabrera.(Neptalie Batolenio)

Suspek sa pagpatay sa body guard sa mayor nadakpan?

2007-10-11T07:43:00.000-07:00

GITUMBOK nga suspetsado sa pagpatay sa driver body guard sa mayor sa lungsod sa Clarin, Misamis Occidental ang duha sa tulo ka mga dinakpan alayon sa pagpatuman sa oplan bakal program.

Ang mga nadakpan sa mga sakop sa kapolisan sa Ozamiz City mao sila si Sonny Jon Tagaloguin ug Mario Manisan nga adunay gipakitang identification card nga sakop sa Provincial Government Office-Civil Security Unit (PGO-CSU) ug laing usa ka Police officer 2 Norberto Libres nga giingon nga didto na madistino sa Cotabato City.

Ang tulo nakuhaan og duha ka kalibre 45 nga pistola uban sa unom ka mga magazines ug usa ka 9mm pistol nga adunay duha ka magazine.

Sa iyang kabahin gipadayag ni Ozamiz City mayor Reynaldo Parojinog, Sr., nga nakadawat siya og taho nga adunay tulo ka tawo nga nagsakay og single motor nga adunay gabugdo sa hawak nga naglibot-libot sa siyudad hinungdan nga iyang gipalihok ang kapolisan aron sa pagtino niini.

Gipasabot ni Parojinog nga uban sa mga polis ilang nakita ang tulo sa may Rizal Avenue ug sa ila kining giduol namatikdan nga aduna kini armas hinungdan nga ilang gidala sa kuwerpo sa kapolisan. Giaasoy sa mayor nga wala man hinuon mopakita ang tulo sa pagsukol sa dihang ilang gisita.

Gidugang ni Parojinog nga ilang gidala sa kuwerpo sa kapolisan ang tulo human nga wala kini makapakita sa mga kamatuoran nga adunay pagtugot sa pagdala og armas gikan sa Comission on Election (COMELEC) ilabina nga gipatuman ang gun ban.

Sa kabahin sa mga nadakpan gipasabot niini nga padulong sila nga mag-withdraw og kuwarta sa bangko hinungdan nga aniaa sila sa Ozamiz.

Pipila ka gutlo human nga madakpi ang tulo, midangat usab ang duha ka mga testigo og mitumbok nila ni Tagaloguin ug Libres nga reponsabli sa pagposil-patay ni Emanuel Cabrera, driver-body guard ni Mayor David Navarro niadtong Oktobre 5.

Managsamang gisaysay sa duha nga ilang nakita nga si Libres ang miposil sa makatulo ka higayon diin si Tagaloguin ang nagmaneho sa sakyanan.

Gipadayag sa usa sa mga saksi nga naa siya sa front seat sa dihang nahitabo ang pagpamosil samtang nagmaneho ang biktima hinungdan nga dili siya masayop sa iyang nakita.

Giasoy sa laing testigo nga anaa usab siya sa luyo sa driver sa sakyanan hinungdan nga klaro niya ang nawong sa miposil og sa nagmaneho sa motor nga mitapad sa ilang sakyanan.

Gidugang niini nga midangat sila sa Ozamiz gumikan kay adunay silay gipalit niadtong higayuna.
Wala usab moluwat sa iyang pamahayag si Police senior superintendent Erwin Villacorte, Philippine National Police (PNP) provincial director human nga mkigkita kini ni Parojinog.

Hinuon, gipadangat niini sa mga sakop sa media nga hulaton lang una ang resulta sa paraffin test ug ballistic examination nga karong adlawa.(Neptalie Batolenio)

PNP gidid-an pag-esckort sa mga commercial activities

2007-10-11T07:42:00.000-07:00

GIDID-AN na ang kapolisan labina niadtong gitawag og motorcycle cops pag-escort sa mga commercial activities nga mga parada ingon man sa mga lubong, kasal ug anibersaryo.

"This is a nationwide directives from the new PNP Director Avelino Razon," pamahayag ni Police Regional Deputy Teodorico Capuyan.

Matod ni Capuyan nga kadto lang mga dagkong opisyal sa gobiyerno, kapolisan ug uban pa nga mga importanteng bisita nga nagkinahanglan og igong seguridad ang hatagan og escort sa motorcycle cops.

Sigun sa kamandoan ni Razon nga walay motorcycle cops nga mo-escort sa mga parada nga gipasiugdahan sa mga pribadong establisimento diin nag-promote kini sa ilang produkto o kaha nagpahigayon sa ilang mga anibersaryo.

Na-obserbahan nga dunay nagpahigayon og lubong nga gi-eskortan sa motorcycle cops diin wala kini mauyoni sa mga opisyal sa kapolisan.
"Kon mag-escort og usa ka lubong otherwise tanan nga lubong hatagan og escort sa pulis para patas," paasabot ni Capuyan.

Subay niini giaghat ni Capuyan ang publiko nga motaho sa iyang buhatan kon dunay mga polis nga ilang makit-an nga nag-escort og lubong ug sa bisan unsang kalihokan.

Siya nipasidaan nga dili siya magdumili pagsilot sa mga polis nga mosupak niini nga kamandoan.
"Sa RTA sila mangayo og escort kay dili man under sa PNP," padayag ni Capuyan.(sunstar)

Panaghiusa nagtumong sa kalinaw

2007-10-11T07:41:00.000-07:00

OROQUIETA CITY—Gituohan ni Misamis Occidental Govenor Loreto Leo Ocampos nga mahimong makab-ot ang dugang kalambuan sa lalawigan kon matuman ang tanan nga mga lakang nga gihimo may kalambigitan sa gipahigayon nga Peace and Order Council (POC) Meeting niadtong Oktobre 8 sa Provincial Function Hall.

Gidugang ni Ocampos nga tumong sa maong panagtagbo nga makabaton og hiniusang direksiyon ang nagkadaiyang local government units (LGU’s) alang sa pagpatunhay sa dagan sa kahusay ug kalinaw sa tibuok probinsiya.

Gipasabot ni Ocampos nga kinahanglan nga dili magbulagbulag ang nagkadaiyang sector, ilabina ang katawhan ug ang LGU aron makab-ot ang gitinguhang kalambuan.

Gipunting ni Ocampos nga alang sa pagpakigbatok sa nagkadaiyang porma sa kriminalidad sa Misamis Occidental kinahanglan nga anaa ang panaghiusa.

Giangkon usab ni Ocampos nga adunay nahitabong pagkabahinbahin human nga miagi sa politika apan tinguha niini nga mahiusa ang nagkadaiyang sector sa politika kon ang hilisgutanan mahitungod sa peace and order.

Kinhanglan usab nga respetuhan ang nagkadaiyang political beliefs apan sa isyu sa kalinaw kinhanglan ang panaghiusa.

Ang maong kalihukan gitambungan nila ni Vice-governor Francisco Paylaga, Jr., mga sakop sa hunta probinsiyal, Provincial director sa Department of Interior and Local Government Teodoro Paller, Philippine National Police (PNP) provincial director Police senior superintendent Jose Erwin Villacorte; Colonel Romulo Bambao, commanding officer sa 101st Brigade Philippine Army, mga nagkadaiyang mayor sa lalawigan nga naglangkob nila ni Ozamiz City Mayor Reynaldo Parojinog, Sr., Clarin municipal mayor David Navarro ug Baliango municipal mayor Ernie Clarete.

Ang maong peace and order meeting sukwahi sa naandan gumikan kay adunay workshop nga gipahigayon nga giapilan sa mga nagkaiyang sector, mga mayor ug mga sakop sa kapolisan.

Sa unang workshop pinaagi sa pag-ila sa problema nga nasinati sa lalawigan migawas nga nag-una ang Illegal suwertres, ikaduha ang illegal drugs, ikatulo ang carnpping, ikaupat ang loose fire arms o paghupot sa ihalas nga armas, ikalima ang video karera ug robbery hold-up, ikaunom ang illegal fishing, ikapito ang traffic violation ug illegal nga sabong sa manok, ikawalo ang insurhensiya, ikasiyam ang prostitution, ikanapulo ang illegal logging ug ika-onse ang video piracy. Lakip usab sa gituki may kalambigitan sa paghupot og mga private army.

Sa ikaduhang hugna sa workshop mao ang pag-ila ug pagtumbok sa mga gidudahan nga responsabli sa maong mga salaod. Diin gisumiter sa mga mayor ang ngalan sa mga gidudahan nga mga operators sa sugal hinuon wala gipakita sa mga sakop sa media ang maong mga listahan. Gituki lamang ang maong mga ngalan pinaagi sa usa ka close door meeting. Nasayran nga natumbok usab nga taliwala sa mga sakop sa kapolisan nakalusot ang illegal nga sugal nga suwertres diin natuki usab ang mga ngalan sa protector niini.

Gisaysay sa gobernador nga ang gisumite sa mga mayor ug kapolisan nga ngalan sa mga dagko ug gagmay nga nalambigit sa maong kahimuan anaa sa ilang talaan ug ilang himuon ang mga maayong lakang aron sa pagsulbad sa maong mga suliran.

Gidugang sa pagpasabot sa gobernador nga dili lang kutob sa workshop ug covenant signing ang himuon apan ang posible nga pagsikop sa mga criminal ug mga nalambigit niini.

Ang ikatulong hugna sa workshop mao ang aksiyon nga himuon aron masumpo ang maong mga problema diin migawas nga kinahanglan ang pagpalig-on sa operation bakal, police visibility, pagsikop ug pagsilot sa mga makasasala, pagkigdayalogo alang sa suporta sa katawhan, pagpahiluna og mga check points, pagsikop sa mga protector, edukasyon alang sa tanan ug moral recovery.

Ang ikaupat nga hugna naglambigit sa mga babag ug mga hagit sa pagsulbad sa maong mga suliran. Diin namatikdan nga adunay political intervention, kakulang sa gahing salapi ug sa mga awtoridad.

Hinuon gipasalig sa gobernador nga sa maayong pagkaplansa niini butangan og pundo alang sa kahimuan may kalambigitan sa peace and order.

Sa kabahin sa kapolisan gisaysay ni Villacorte ang tinuod nga dagan sa kahusay ug kalinaw sa lalawigan pinaagi sa ilang mga acoomplishment reports diin kontrolado pa ang peace and order situation.

Gisaysay usab sa militar pinaagi ni Col. Bambao nga kanunay ang ilang kampanya mahitungod sa insurhensiya u gang pagpatuman sa amnesty program alang sa mga rebel returnee.(Neptalie Batolenio)

Komentarista gipusil, kritikal

2007-10-11T07:40:00.000-07:00

ILIGAN City - Talandugon ang kahimtang sa usa ka komentarista sa radyo human gipusil sa wala mailang lalaki kagahapon sa buntag duol sa usa ka tunghaan ning siyudad.

Ang biktima mao si Jose "Joe" Pantoja, hingkod ang panuigon ug blocktime commentator sa dxLS "Love Radio" FM.

Ang inisyal nga imbestigasiyon sa kapolisan nagbutyag nga nahitabo ang pagpamusil nga alas 7:10 sa buntag.

Sa wala pa ang pagpamusil gikan naghatod sa iyang anak sa tunghaan ang biktima sakay sa iyang motorsiklo. Sa pagbalik ni Pantoja nihunong kini sa usa ka copying center duol sa Mindanao State University-Iligan Institute of Technology (MSU-IIT) sa Tibanga highway aron magpakopya og mga dokumento.

Usa ka armadong lalaki nga naka-bonnet ang niduol sa biktima og nipusil kaniya makatulo ka higayon gamit ang kalibre .45.
Samad sa tuong kilid ug sa tiyan nga bahin ang naangkon sa biktima.

Dali nga nisibat ang suspetsado ug nisakay sa naghulat nga motorsiklo nga gimaneho sa laing naka-bonnet nga lalaki.
Samtang dali usab nga gidala sa Mindanao Sanitarium and Hospital mga 200 metros lang gikan sa nahitaboan ug anaa kini sa kritikal nga kahimtang sulod sa intensive care unit.

Dili pa matino ang motibo sa maong pagpamusil apan dako ang posiblidad nga may kalambigitan kini sa iyang trabaho human kini nakadawat og ubay-ubay na ka mga hulga pinaagi sa text messages.

Gilauman ni Mayor Lawrence Cruz ug sa mga kadagkuan ning dakbayan nga mahatagan og daling kasulbaran ang maong hitabo tungod kay adunay naka-instalar nga surviellance camera didto sa nasangpit nga lugar nga posibling maoy makahatag og giya kung kinsa ang responsabli sa maong hitabo.

Samtang gimando sa hepe sa Police Regional Office (PRO) 10 nga hatagan og igong seguridad ang sakop sa prensa nga giluthang sa dakbayan sa Iligan samtang nagpabilin kini sa tambalanan.
Lakip sa gimando ni Chief Supt. Teodorico Capuyan, Police Regional Director sa PRO-10 ang hugot nga imbestigasyon sa maong hitabo.

Subay niini gipaguwardiyahan na sa mga polis ang tambalanan diin gidala si Pantoja aron maseguro nga dili kini tiwasan sa mga suspetsado.

Dili pa lang dugay gibutyag ni Capuyan nga usa sa gihingusgan sa bag-ong PNP Director mao ang dali nga pagsulbad sa extra judicial killings nga nahitabo partikular na sa mga sakop sa prensa nga nangabiktima.(Sunstar)

OCAMPOS: Iresponsabli ang pahayag ni Oaminal sa PBB

2007-10-11T07:39:00.000-07:00

GITAWAG ni Misamis Occidental Governor Loreto Leo Ocampos ang pamahayag ni Misamis Occiental 2nd District Board Member Henry Oaminal kabahin sa Panguil Bay Bridge (PBB) nga irresponsible ug kulang sa hustong kasayuran kabahin sa proyekto.

Partikular nga gitumbok sa gobernador ang pagtandi ni Oaminal sa NBN project nga nahimong kontrobersiyal sa nasud atol sa gipahigayon nga regular session sa Sangguniang Panglalawigan.

Gipasabot ni Ocampos nga kinhanglan una nga mohimo og research si Oaminal kabahin sa maong proyekto aron dili magpasagad sa pagbuhi og mga iresponsabli nga komentaryo.

Gikabalak-an ni Ocampos nga gumikan sa maong pamahayag mosibog ang mga nagkainteres mga mga investor sa maong proyekto.

Gipasabot ni Ocampos nga mahimo man nga konsultahon siya pinaagi sa tawag sa telepono mahitungod sa pagpakisayod sa maong pproyekto ug dili lamang gamiton ang hawanan sa Sangguniang Panglalawigan alang sa usa ka grandstanding o pagpanghambog.

Iyang gipunting nga taud-taod nga gipaningkamutan sa lalawigan nga makuha ang maong proyekto apan mahimong mahanaw lamang usab gumikan sa iresponsabli nga komentaryo.

Sa iyang kabahin gipadayag ni Oaminal nga nagtinguha siya nga adunay mahitabong panagtagbo tali sa gobernador ug sa mga board members aron masayod sila sa detalye sa memorandum of agreement nga gipermahan tali sa Department of Public Works and Highways (DPWH) ug sa mga local government units (LGU) sa Tubod Lanao del Norte ug sa provincial government sa Lanao del Norte, city government sa Tangub ug sa provincial government sa Misamis Occidental niadtong Hulyo 8.

Gumikan sa kaukopado sa panahon sa gobernador sanglit niadtong maong panahon gihimo na ang preparasyon alang sa election sa League of governors, walay nahitabo nga meeting tali sa gobernador ug sa mga board members.

Hinuon giangkon ni Oaminal nga wala siya mokomentaryo nga ang PBB adunay iregularidad. Iya lamang nga gipadayag sa SP nga iyang nabasa sa usa ka peryodiko nga gibutang na ang publication sa invitation to pre-qualify and bid.

Diin iyang nakita nga ang scope of work sa coverage sa maong proyekto mao ang financing, design, construction ug operate sa PBB.

Gisabot ni Oaminal nga tungod kay dugay na ang maong proyekto nagtuo siya nga aduna na kini plano ug desinyo. Ang pagbuhat og plano ug desinyo adunay gasto ilabina nga mokuha kini og consultant sa pagkuha niini. Hinuon gisaysay ni Oaminal nga kini pinaagi lang usab sa iyang pagsabot og posible nga siya nasayop usab apan kon matinuod man ang iyang pagsabot iyang gikuwestiyon ang paglakip sa bidding sa plano ug sa desinyo diin mahimong magdoble ug magdoble usab og bayad.

Iyang gituyo nga sa hawanans a SP niya gipadayag aron mapatawag usab ang DPWH sa pagsaysay mahitungod sa maong proyekto.

Gipasabot ni Oaminal nga siya mismo aduna may negsoyo nga construction hinungdan nga aduna na siyay daghan nga kasinatian sa mga proyekto sa gobiyerno. Iyang gipatin-aw nga walay kalabutan ang iyang pagkanesgosyante sa pagtuki sa PBB.

Iyang gitin-aw usab nga wala siya mag-grandstanding hinuon tinguha lamang niya nga mapaklaro ang tanan.

Tinguha usab niya nga makigdugtong sa gobernador mahitungod sa maong hilisgutanan ilabina nga nga gitawag ni Ocampos ang iyang pamahayag nga irsponsabli.(Neptalie Batolenio)

Tri-media forum ug fellowship gihimo sa Iligan

2007-10-07T06:16:00.000-07:00

ILIGAN CITY: Duolan sa 80 ka mga sakop sa media nga naglangkob sa television, radyo ug pamantalaan nga naggikan sa Cagayan de Oro, Ozamiz ug Iligan City ang mitambong sa sa gipahigayon nga First Regional Media Forum and Fellowship niadtong Sabado, Oktobre 6.

Tumong sa maong kalihukan aron labing mapalambo ang kahibalo sa mga sakop sa media u gang labing pagpalig-on sa relasyon sa usag-usa.

Ang maong kalihukan gipaluyohan sa Call for Justice Movement (CFJM) nga gipahigayon sa D’zyr resto Bar.

Ang panagtagbo sa mga sakop sa media nagdala sa tema nga “Unity for Truth and Development” kon Panaghiusa alang sa Kamatuoran ug Kalambuan.

Sa iyang kabahin gipadayag ni Atty. Ver Quimco chairman sa CFJM ug usa usab ka magsisibya nga ang maong kahimuan tumong sa pag-uli sa pagkabahinbahin sa pipila ka mga sakop sa media tungod sa nakalabay nga bugnong lugaynon.

Ang tibuok adlaw nga kalihukan nasudlan sa mga pakigpulong ug diskusyon nga naglangkob nila ni Demosthenes Plando, CFJM vice-president, Rudolf Jularbal, standards authority officer sa Kapisanan ng mga Brodkaster ng Pilipinas (KBP) ug Archbishop Elinito Gallledo.

Lakip sa mitambong si Iligan City Mayor Lawrence Cruz, Atty. Perfecto Chung sa Transmission Corporation (TRANSCO), KBP regional chairman ug dxOC-AM station manager Delia Rosal, retired city Prosecutor Norma Siao ug Rene Fe Padilla, executive director sa Watch Incorporated.

Sa iyang kabahin gipadayag ni Chung nga kinahanglan sa mga sakop sa media ilabina sa mga tigbalita nga itaho lamang ang matuod ug likayan ang paghatag og mga side comments sa balita.

Sa iyang pakigpulong gipadayag ni Mayor Cruz nga bilihon ang kamatinud-anon sa balita isip kaabag sa kalambuan.

Sa pakgpulong ni Bishop Galledo iyang gipasabot nga ang media dako og papel sa pagmugna unsa nga matang ang usa ka komonidad ilabina nga hilabihan kini ka gamhanan.

Ang pakigpulong usab ni Jularbal nakasentro sa “Social Responsibility and Ethical Standards of Broadcasting”.

Gihagit usab niini ang mga sakop sa media nga gamiton ang gahom sa media sa responsabli nga paagi pahaom sa code of ethics.(Neptalie Batolenio)

Peace and order council meeting ipahigayon sa probinsiya

2007-10-07T06:15:00.000-07:00

IPAHIGAYON karong adlawa, Oktobre 8, ang Provincial Peace and Order Council (PPOC) meeting sa Capitol Function Hall sa pagpanguna ni Misamis Occidental Governor Loreto Leo Ocampos diin tumong niini aron nga makab-ot ang tinuod nga kalambuan sa lalawigan.

Gipadayag ni Ocampos nga ang nasangpit nga kahimuan tambungan sa mga tag-as nga opisyal sa militar kapolisan ug mga sakop sa PPOC nga nagrepresentar sa multi-sectorral groups nga nagtinguha nga mapalig-on ang tinguha sa kalinaw sa Ozamiz, Oroquieta ug Tangub City ug sa 14 ka mga lungsod.

Gisaysay sa gobernador nga ang mga sakop sa Philippine National Police (PNP) mopakita sa tinuod nga kahimtang sa lalawigan ilabina sa dagan sa kahusay ug kalinaw samtang ang mga sakop sa Philippine Army mohulagway mahitungod sa insurhensiya.

Ipahigayon usab ang usa ka workshop may kalambigitan sa peace and order nga naglangkob sa illegal drugs, paghupot sa ihalas nga armas, illegal nga sugal, isurhensiya, amnesty program alang sa mga sakop sa rebelde nga mibalik sa sabakan sa balaod ug mga pinangita sa balaod.

Ang maong panagtagbo magtuki usab sa himuon nga slogan aron labing mapasibaw ang dagan sa kahusay ug kalinaw sa lalawigan.

Nasayran nga ipahigayon usab ang usa ka covenant signing sa tanang sector sa pagaseguro sa malahutayon nga kalinaw isip paagi sa pagkab-ot sa lunsay nga kalambuan sa probinsiya.(Neptalie Batolenio)

Aldong, mipasidaan sa Skycap

2007-10-07T06:14:00.000-07:00

NAKIGTAGBO si Ozamiz City Mayor Reynaldo Parojinog ngadto sa mga porters sa sa airport kon Skycap aron sa pagpahinumdum kanila nga magbantay sa mga laing tawo o grupo nga magpasipala sa mga pasahero sa eroplano.

Tinguha ni Parojinog nga dili na masubli ang nahitabo nga usa ka balikbayan gikan sa Michigan ang nawad-an sa iyang handcarry bag nga gisudlan sa iyang passport ug sa uban pang mga travel documents sa dihang adunay nagpakaaron-ingnon nga porter nga misugat niini.

Gihinabi usab sa mayor sila si Norvic Angulo ug Jeffrey Majorenos, ang duha ka mga skycap nga maoy nangalsa sa mga bagahe sa biktima niadtong higayona.

Kahinumduman nga misumbong sa mayor ang usa ka Sandra Buyco Go mahitungod sa maong hitabo kinsa gikan sa gawas sa nasod aron nga mopauli sa Kumalarang Zamboanga del Sur.(Adonie Decina)

Estudyante, gilugos; suspek nadakpan

2007-10-07T06:13:00.000-07:00

NADAKPAN sa mga sakop sa kapolisan ang usa ka tawo nga gireklamo sa kasong pagpanglugos sa usa ka 20 anyos nga estudyante sa usa sa mga barangay sa Ozamiz.

Nahitabo ang pagpanglugos niadtong Septiyembre 23 sa may alas tress a hapon.

Ang suspetsado naila nga usa ka Junarie Sabate, 23 anyos, ulitawo ug lumolopyo sa Barangay Upper Ibabao Dimonan, Dumingag, Zamboanga del Sur.

Nasayran nga sa imbestigasyon sa mga sakop sa kapolisan ang biktima tungod kay ilalom sa ilimnon nga makahubog natulog kini sa sofa sa ilang panimalay. Samtang ang suspetsado nga sinaligan ra usab sa biktima nga mikugos niini ug midala ngadto sa usa ka lawak. Diin didto gihimo ang paglugos sa biktima.

Sa dihang nakamata ang biktima iya na lamang nga namatikdan nga wala na sa siyay sapot. Gumikan sa kahadlok sa biktima dali kini siya nga mipahilayo padulong sa panimalay sa iyang mga higala.

Human niadto ilang napahibalo ang insedente ngadto ni Jonathan Rubio, Ozamiz City administrator nga mao usay mitawag ngadto sa mga sakop sa 1005th Provincial Mobile Group (PMG) hinungdan nga nadakpan ang suspetsado.

Kasong pagpanglugos ang ipasaka sa biktima ngadto sa suspetsado.(Neptalie Batolenio)

PMA ug DepEd mihimo og medical check-up

2007-10-07T06:11:00.000-07:00

MANAGSAMANG gipahigayon niadtong nakalabayng semana sa DepEd ug Philippine Medical Association (PMA)-Ozamiz Chapter ang nationwide universal medical and dental check-up sa mga public elementary schools ning siyudad sa Ozamiz.

Gipadayag ni Dr. Annabelle Genon, PMA-Ozamiz Chapter president, ang naasoy nga kalihukan usa ka early health detection and prevention sa mga kabataaan subay sa health education reform program ni Presidente Gloria Arroyo.

Ang maong kalihukan maoy labing una nang higayon sa Ozamiz diin ang mga tulonghaan sa elementarya libot sa siyudad ang nakapahimulos.

Hinoon, gipasalig sa PMA-Ozamiz nga himoon na nila kini matag tuig aron mas ubay-ubay pa nga mga kabataan ang makapahimulos.

Gidugang pa ni Genon nga sa higayon nga adunay mga kabataan nga positibo sa mga nagkadaiyang sakit human sa check up, ila kining resitahan sa tukmang mga tambal aron mahingpit ang kaayuhan.

Mga tinun-an sa Doña Consuelo Elem. School naka-awards

2007-10-04T04:14:00.001-07:00

NAKAANGKON og mga awards ang Doña Consuelo Elementary School sa gipahigayon nga nagkadaiyang contest sa natad sa Mathematics, Science ug Filipino.

Sa gipahigayon nga National Super Quiz Bee sa division level sa Ozamiz City Central School naangkon ni Czarina Sale ang ikatulong dapit niadtong Oktobre 3 . Sa district level una na niining naangkon ang ikaduha nga puwesto nga gipahigayon sa Maningcol Elementary School.

Sa natad sa Science sa Youth for Environment in Schools Organization (Yes-O) mitala sa unang dapit ang tulo ka mga tinun-an sa naasoyng tulonghaan sa division level.

Sa district level, nakuha ni Reneca Adolfo ang ikaduhang puwesto sa Sci-Quiz ug ikatulong dapit sa Yes-O. Diin ikaduha usab nga puwesto ang naangkon ni Sale sa Sci-Dama sa grade six category. Si Jake Capangpangan nakaangkon sa unang dapit sa Sci-Dama sa grade four category.

Sa Filipino, sa deklamasyon nakuha ni Charles Sale ang ikatulong dapit sa division level ug unang puwesto sa district level.

Samtang sa story telling, migawas nga ikaduhang dapit si Gabriel Fiel.

Gilauman ni Joseph Galia, principal sa Doña Consuelo Elementary School nga sa naangkon nga mga kadaugan labing maningkmautan niini nga sa sunod nga mga contest makakuha gihapon sa maong mga pasidungog o mas labaw pa.

Nasayran nga ang mga coaches sa maong mga tinun-an naglangkob nila ni Jonrey Q. Buenaflor sa Mathematics, Crisfer Adolfo sa Science ug Joy Samson sa Filipino.

Gipasalamatan usab sa maong tulonghaan ang mga barangay council ug PTCA officers ilabina ang mga magtutudlo nga makanunayon nga nagsuporta sa pagpalambo sa maong tulonghaan.(Jonrey Buenaflor)

Opisyal sa barangay nga gikidnap nakauli na

2007-10-04T02:23:00.000-07:00

KAUSWAGAN, Lanao del Norte—Hingpit na nga nabalik sa iyang pamilya ang usa ka opisyal sa barangay human nga gibihag sa wala mailang suspetsado.

Nabalik na sa iyang pamilya si Manuel Gomez, 76 anyos ang pangidaron human sa gilusad nga negosasyon sa mga sakop sa kapolisan sa lalawigan.

Sa pagpakighinabi sa dxDD-AM, gipadayag ni Philippine National Police (PNP) provincial director senior superintendent Linog Bagol nga sulod sa mokapin sa duha ka adlaw nga pagkabihag nahibalik kini sa pamilya niadtong Septriyembre 27 sa may alas dose sa udto.

Gidugang ni Bagol nga walay ransom nga gihatag ngadto sa mga kidnappers gumikan kay nadala ra kini sa ilang gihimong negosasyon.

Gipasabot ni Bagol nga walay kalabutan ang mga sakop sa Moro Islamic Liberation Front (MILF) sa nahitabong kidnapping. Iyang gidugang nga may kalambigitan sa politika ang nahitabong pagkidnap.

Iyang gisaysay nga ang usa sa mga suspetsado usa ka supporter sa napilding kandidato diin tinguha niini nga mabutang sa kaulaw ang midaog nga kandidato hinungdan nga nahitabo ang pagpamihag.

Kahinumduman nga gibihag si Gomez samtang padulong kini sa iyang kalubihan sa Barangay Inudaran niadtong Septiyembre 25 sa may alas 10: 00 sa buntag.(Neptalie Batolenio)

Kumander sa NPA nadakpan

2007-10-04T02:15:00.000-07:00

CALAMBA,MisOc—Nasikop sa hiniusang puwersa sa kapolisan ang usa ka sakop sa Communist Party of the Philippines-New Peoples Army (CPP-NPA) sa gilusad nga operasyon.

Ang nadakpan naila nga si Joe Villas Paculba, alyas Ka Joel, 22 anyos ang pangidaron, ulitawo ug lumolopyo sa Barangay San Agustin, Sapangdalaga, Misamis Occidental.

Nasayran nga si Paculba giilang kumander sa 2nd squad sa Front Committee Sendong nga nag-atubang sa kasong robbery in band, triple muder nga naglangkob sa frustrated murder ug multiple murder nga naglangkob og quadruple frustrated murder.

Gisikop ang maong kumander pinaagi sa gipagawas nga warrant of arrest sa korte diin walay piyansa nga gitugot sa temporaryong kagawasan.

Sa imbestigasyon sa mga sakop sa kapolisan nasayran nga si Ka Joel usa sa misulong sa Civilian Armed Forces Geographical Unit (CAFGU) detachment niadtong Marso 20, 2006.

Ang maong detachment nailalom sa 5th Infantry Battalion, Philippine Army sa Upper Buatista, Sapang Dalaga.

Diin nadala sa mga rebelde ang lima ka M16 Rifle, usa ka super .38 caliber, ug usa ka 9mm nga pistola.

Samtang niadtong Abril 11, 2006 gikaengkuwentro usab sa mga rebelde ang hut-ong sa mga sundalo diin hikabsan sa kinabuhi ang usa ka Sergeant William Escudero ug duha ka mga sakop sa CAFGU. Nadala usab sa mga rebelde ang usa ka M60, 14 ka garand rifles, duha ka M16 rifles, tulo ka M14 rifles ug mga bala.

Dugang hitabo nga nalambigit si Ka Joel sa usa ka nahitabong ambush niadtong Oktobre 29, 2005 sa mga sakop sa 15 DRC, Philippine Army Personnel sa Sitio Calunod, Barangay Bitibot nga meresulta sa kamatyon sa usa ka 2Lt. Arthur Gelotin uban sa lima ka mga sakop sa Philippine Army uban sa duha ka mga sibilyan.

Sa pagksikop sa suspetsado nakuha usab ang usa ka Honda XRM color blue nga dunay plate number nga 2675. Si Ka Joel gibalhog sa Police Provincial Office.(Neptalie Batolenio)

Mini-buses sa RTMI dili pabiyahion sa LTFRB

2007-10-04T02:14:00.000-07:00

HINGPIT na nga gi-aksiyonan sa rehiyonal nga buhatan sa Land Transportation Franchising and Regulatory Board (LTFRB) ang reklamo batok sa mini bus sa Rural Transit Mindanao Incorporated (RTMI).

Sibo kini sa gipagawas nga order ni Regional director Mandangan Darimbang, sa LTFRB Region 10 nga sibo sa ilang pagsuhid walay gihuptan ang mga mini-buses sa RTMI nga nagbiyahe sa Dipolog ngadto sa Ozamiz City.

Ang maong lakang sibo usab sa reklamo ni Misamis Occidental Governor Loreto Leo Ocampos ug ubang mga operator sa mga sakyanan sa illegal nga pagpamasahero sa maong mga mini bus.

Nasayran nga adunay 20 ka mga mini-bus ang gipabiyahe sa RTMI hinungdan nga pinaagi sa gipagawas nga cease and desist order alang sa nasangpit nga sakyanan.

Gumikan niini gimanduan ang Land Transportation Office (LTO) nga mopatuman sa nasangpit nga kamanduan sa pagsikop sa mga sakyanan kon padayon kini nga namasahero human sa paggawas sa kamanduan.

Sa panagtagbo sa LTFRB ug mga kadagkuan sa RTMI niadtong Septiyembre 21 giangkon usab sa naulahi nga wala silang permit nga gihuptan alang sa ilang pagbiyahe.

Ang moang kamanduan gipagawas usab dayon niadtong Septiyembre 21.(Neptalie Batolenio)

Namaligya og gasolina sa dalan gidili sa BFP

2007-10-04T02:08:00.000-07:00

DAKPON sa Bureau of Fire Protection (BFP) ang si bisan kinsa nga mamaligya og gasolina sa daplin sa dalan.

Gipadayag ni Fire senior inspector Rommel Villafuerte, Ozamiz City Fire Marshall nga sibo sa gilatid sa fire code of the Philippines dakong supak ang pagbaligya og bisan unsa nga produktong petrolyo sa daplin sa dalan.

Gidugang ni Villafuerte nga hamyang sa disgrasya ilabina sa sunog ang pag-display og mga gasoliona sa daplin sa dalan.

Ang pamahayag ni Villafuerte sibo usab sa namatikdan nga adunay mga namaligya og mga gasolina sa daplin sa dalan nga gisulod og mga botilya ilabina sa National Highway.

Niadtong nakalabay nga semana gisuhid usab sa mga lumilihok sa BFP ang mga namaligya og mga gasolina sa may Rizal, Avenue.

Gipasabot sa fire Marshall nga tinguha lang usab nila nga mapanalipdan ang katawhan sa posible unya nga peligro nga idulot gumikan sa pagmahimutang og mga gasolina sa daplin sa dalan nga wala gitugot sibo sa nalatid sa fire code of the Philippines.(Neptalie Batolenio)

Electric cooperative iparehistro ni Migz sa CDA

2007-10-04T01:58:00.000-07:00

UYON si Senador Miguel ‘Migz’ Zubiri nga iparehistro sa Cooperative Development Authority (CDA) ang tanang mga Electric Cooperatives.

Gipadayag niini nga ang iyang tinguha nga marehistro sa CDA ang mga electric cooperatives aron nga mahimong makabenipisyo kini sa libre nga mga buhis.

Gisaysay niini nga ang pagmahal sa balayronon sa kuryente naglangkob usab kini sa buhis nga gibayran sa mga electric cooperatives sama sa income tax ug uban pa.

Gidugang ni Zubiri nga makadaginot ang electric cooperatives ilabina kon narehistro na kini sa CDA.

Isip chairman sa committee on cooperatives sa Senado iyang gipasabot nga priyoridad niya nga mohimo og mga amendments sa cooperative code. Ang cooperatives code namugna niadtong 1989 diin duolan na sa 20 ka tuig nga adunay namatikdan nga dili haom ilabina sa promotion sa kooperatiba tungod kay kulang sa ngipon ang nasangpit nga balaod.

Gidugang ni Zubiri nga iyang dugangan og ngipon ang CDA ilabina nga daw sa registration body lamang ang nahimong gamit niini. Diin ang maong amendments naglangkob sa pagpaklaro nga mandatory ang pagparehistro sa mga electric cooperatives ngadto sa CDA.

Gidugang niini nga ilalom sa Epira Law gilatid nga kinahanglan nga moparehisro sa CDA ang mga electric cooperatives apan adunay pag-uyon sa National Electrification Administration (NEA).

Gipasabot ni Zubiri nga dili mosugot ang NIA nga iparehistro ang electric cooperative gumikan kay mahadlok nga mawad-an sila og negosyo ug responsibilidad. Gumikan niini sa iyang amendment nga paghahimon himuong mandatory ang registration.(Neptalie Batolenio)

Drugtest sa mga kandidato kinahanglan

2007-10-03T15:44:00.000-07:00

POSIBLENG dili maproklamar ang kandidato nga dili mosumiter sa resulta sa drugtest sa higayon nga modaug kini sa piliay.

Kini ang gibutyag ni Atty. Dennis Ausan, Regional Election Officer sa Commission on Election (Comelec) 10 isip pahimangno ngadto kanila.

Gidugang ni Ausan nga usa kini sa rekisitos alang sa mga magpapili.

Gipasabot ni Ausan nga gihatagan og higayon sa Comelec ang mga kandidato nga puwede pa nilang isumiter ang resulta sa ilang drugtest sa Oktubre 18, 2007 atol sa katapusang adlaw sa pagduso sa ilang sertipiko de kandidatora.

Apan matod niya nga wala kini nagpasabot nga dili na sila mosumiter taliwala nga gidawat na sa Comelec ang ilang giduso nga certificate of candidacy (CoC).

Subay niini subling giaghat ug gipahinumduman ni Ausan ang mga kandidato nga kon mahimo ilakip na ang resulta sa ilang drugtest atol sa ilang pagduso sa CoC.(Sunstar)